ВИДЕО — ЫРААЗЫЧЫЛЫК МЕНЕН ЖЫЛУУЛУККА БӨЛӨНГӨН КЕН ЖАЙЫНДАГЫ МАЙРАМДЫК КЕЧЕ

Жарыяланган: 24 December 2024

Жаңы жылдын алдында Кумтөр кен жайынын администрациясы тарабынан турак жай лагеринин, коомдук тамактануу жана жүргүнчүлөрдү ташуу кызматынын жумушчулары үчүн майрамдык кече уюштурулду.

Нөөмөтү аяктап, вахта аралык эс алууга бара жаткан кызматкерлерди кен жайдын директору Кубаныч Молдобеков келе жаткан Жаңы жылы менен кызуу куттуктап, мыкты кызматкерлерге КГКнын президентинин атынан ыраазычылык баракчаларын тапшырды. Компаниянын өнүгүшүнө кошкон салымы үчүн терең ыраазычылык билдирип, иштерине зор ийгиликтерди каалады.

Ошондой эле, бөлүм башчылары тарабынан эмгекти коргоо жаатында бир топ ийгиликтерге жетишкен кызматкерлердин эмгеги баса белгиленип, корпоративдик белектер тапшырылды.

Кеченин меймандары үчүн кен жайдын таланттуу жамааты тарабынан чакан концерттик программа уюштурулуп, жагымдуу маанайдагы кече даамдуу майрамдык дасторкон жана таттуу торт менен коштолду.

120дан ашык кызматкер катышкан майрамдык бул кече – ак эмгек ар дайым бааланып, колдоого алынаарын, ар бир кызматкер Кумтөрдүн ынтымактуу чоң үй бүлөсүнүн бир бөлүгү экенин сездирген жагымдуу атмосферада уланды.